Жас химиктер әлемді мойындатты
Қазақстан Республикасының Оқу-ағарту министрлігі
5–14 шілде аралығында Біріккен Араб Әмірліктерінде өткен Халықаралық химия олимпиадасында (IChO-2025) қазақстандық оқушылар керемет нәтиже көрсетті. Еліміздің атынан қатысқан төрт оқушы да жүлдегер атанып, Қазақстанның білім саласындағы беделін тағы да биіктетті.
Әлемнің 93 елінен келген 360-тан аса оқушы бақ сынаған бұл зияткерлік додада отандастарымыздың екеуі алтын, екеуі күміс медаль иеленді:
- Кирилл Ким – Астана қаласы, Назарбаев Зияткерлік мектебі, 12-сынып – алтын
- Абылай Кабдулхадыр – Астана қаласы, Назарбаев Зияткерлік мектебі, 12-сынып – алтын
- Еңлік Бақытбекова – Алматы қаласы, Назарбаев Зияткерлік мектебі, 12-сынып – күміс
- Аңсар Жақсылықов – Ақтөбе облысы, «Білім-инновация» лицейі, 10-сынып – күміс
Ұлттық құрамаға ғылыми жетекшілік еткен мамандар:
Санжар Бегдаир – Korea Advanced Institute of Science and Technology (KAIST) магистранты, олимпиада жеңімпазы
Ринат Илюсизов – халықаралық және республикалық білім бәйгелерінің бірнеше дүркін жеңімпазы
Қазақстан Республикасы Оқу-ағарту министрі Ғани Бейсембаев бұл жетістік қазақстандық білімнің әлемдік деңгейде мойындалуының айқын дәлелі екенін атап өтті.
– Бұл жеңіс – жас буынның білімге деген құштарлығы мен еңбекқорлығының жемісі. Жеңістеріңіз жалғасын тауып, биік белестерден көріне беріңіздер! – деп жазды министр әлеуметтік желідегі парақшасында.
Айта кетейік, ҚР Оқу-ағарту министрлігіне қарасты «Дарын» республикалық ғылыми-практикалық орталығының ұйымдастыруымен ұлттық құрама бірнеше оқу-жаттығу жиындарынан өтіп, халықаралық деңгейдегі олимпиадаларға толық дайындықпен барған.
Сондай-ақ, Президент тапсырмасына сәйкес, олимпиада жеңімпаздарына мынадай көлемде сыйақы тағайындалады:
Алтын медаль – 1 500 АЕК,
Күміс медаль – 1 000 АЕК,
Қола медаль – 500 АЕК.
Жетекші ұстаздар да ынталандыру сыйақыларына ие болады.
Былтырғы IChO-2024 олимпиадасында да қазақстандық оқушылар 2 алтын, 1 күміс және 1 қола медаль жеңіп алған болатын.
Ұлттық құраманың бұл жарқын жеңісі – еліміздің білім саласының әлеуеті мен болашағының зор екенін көрсетіп отыр. Жеңімпаз оқушыларды, олардың ұстаздарын және ата-аналарын шын жүректен құттықтаймыз!
