ДӘУЛЕТ ТҰРЛЫХАНОВ
Ашық дереккөзден
Қазақстан Республикасы Парламент Мәжілісі депутаты, грек-рим күресінен әлем және кеңес одағының чемпионы, Олимпиаданың күміс, қола жүлдегері.
1. Қазір еліміздегі ауылдың жағдайы көңіл көншітпейді. Ондағы жол сапасы мен интернет желісінің жетіспеуі де бұған дәлел. Ауылдағы жастардың қалаға көшіп кетуі, ауылда тұрақтамауы – мұның бір айғағы. Біз осы ретте ауылдың жағдайын барынша жақсартуымыз қажет. Бүгінде ауылда қарапайым жұмысшылардан бастап, мұғалім, дәрігер сияқты мамандар жетіспейді. Спортқа көңіл бөлінуі керек. Айта берсек, шешімін табуға тиіс мәселелер жетерлік. Мұның барлығына жүйелі жұмыс пен елге деген ерен сүйіспеншілік, еңбекқорлық қажет. Әрбір азамат елі үшін өз саласында аянбай, қажырлы еңбек етсе, алынбайтын асу, бағындырмайтын белес болмайды деп ойлаймын. Мұндай қиын кезеңде бірлігіміз де бекем болуы қажет.
2. Менің де бір кісідей жомарттығым бар. Бар болса – бересің, жоқ болса – бере алмасаң да, іштей ниеттес боласың. Қазақта тек деген бар, тегінде, осы қасиет аталарымның қанымен берілген шығар.
3. Спорт саласын біз стратегиялық бағытқа енгізуіміз керек. Бірден-бір қатты көңіл аударатын мәселе, бұл – халқымыздың денсаулығы.
4. Ұлттық құндылықтардың ауқымы кең. Оның ішіне бұрынғы ата-бабаларымыздан келе жатқан салт-дәстүрлеріміз, тәлім-тәрбиеміз, мәдениетіміз, менталитетіміз, ұлттық кодымыз, отансүйгіштігіміз барлығы кіреді… Әлеуметтік желілер адамдардың уақытын ұрлап жатыр. Мүмкін, осы әлеуметтік желілерді де дұрыс жағынан пайдаланатын тәрбие құралына айналдыруымыз керек шығар.
