Қазақстанға Орталық Азиядағы ең қуатты суперкомпьютер жеткізілді
Фото: canva.com
Қазақстанға Орталық Азия аумағындағы ең қуатты – 2 экзафлопс есептеу жылдамдығына ие суперкомпьютер жеткізілді. Бұл – жасанды интеллект пен ғылыми модельдеуге арналған әлемдік деңгейдегі заманауи жүйе, ол бүкіл ел аумағындағы стартаптарға, университеттерге және IT-зерттеушілерге қолжетімді болмақ. Жаңа жоғары өнімді есептеу кешені NVIDIA H200 негізінде жасақталған. Суперкомпьютер Қазақстанда алғаш рет ұлттық деңгейдегі жоғары өнімді есептеу экожүйесін қалыптастыруға негіз болады. Бұл бастама жасанды интеллектті дамытуға арналған 2029 жылға дейінгі тұжырымдама мен Президент Жолдауында белгіленген міндеттердің орындалуына бағытталған маңызды қадам.
Суперкомпьютер жүйесі халықаралық Tier III сенімділік деңгейімен сертификатталған МЦРИАП-тың жаңа деректер орталығында орнатылады. Бұл – жүйенің үздіксіз әрі тұрақты жұмыс істеуіне мүмкіндік береді, сонымен қатар ұлттық және халықаралық ауқымдағы ірі жобаларға қолдау көрсетеді.
Жоба аясында Қазақстан алғаш рет жоғары технологиялық жабдықтарды қосылған құн салығын (ҚҚС) және кедендік баждарды төлемей-ақ әкелу тетігін іске асырды. Бұл елдің инвестициялық тартымдылығын арттырып, шетелдік IT-компаниялар мен дата-орталық операторларын тартуға жол ашады.
Цифрлық даму министрі Жаслан Мәдиевтің айтуынша, суперкомпьютерлік кластерді құру – Қазақстанның цифрлық егемендігін нығайту мен өңірлік технологиялық көшбасшы ретінде позициясын бекіту жолындағы стратегиялық кезең. Жаңа суперкомпьютер – Қазақстанның цифрлық болашағына салынған сенімді инвестиция. Ол ғылыми-зерттеу, инновациялық даму және жасанды интеллект салаларында елдің әлеуетін жаңа деңгейге көтермек.
