Армандар — үміттің шамшырағы
canva.com
Адам — арманнан жаралған. Оның жүрегінде бұлқынған ой, жанарында жарқ еткен үміт сәулесі бар. Кейде ол үміт тым алыста — көкжиек астында көміліп жатқандай, кейде тым жақын — жүрек дүрсілінің әр ырғағынан сезіледі. Арман – көзге көрінбейтін, алайда өмірдің әр сәтін мағыналы ете түсетін беймәлім күш.
Арман — бұл болашаққа апарар көпір ғана емес, адамның жан дүниесін баптап, оның болмысын ажарлайтын рухани әуен. Ол адамды алға жетелейді, түңілместен, тоқтамастан ұмтылуға жетелейді. Арман – жанның терең түкпірінде бүр жарған үміт гүлі. Сол гүл ешқашан солмауы үшін, адам оны мәпелеп суарып отыруы керек. Ол — тіршілікке мән беретін жарық сәуле.
Кейде біз армандарымыздан алыстап кеткендей боламыз. Күнделікті күйбең тірлік, бірсарынды өмір, жанға батқан өкініш – бәрі де арманға апарар жолды бұлдыратып жібереді. Бірақ дәл сол сәтте, қараңғылықтың ішінен жарқ етіп бір сәуле туады. Ол — ұмыт қалған, бірақ өшпеген арман. Ол — қайта тірілген сенім.
Арман – бұл мақсаттың анасы. Ол жоқ жерде мақсат болмайды. Армандау – оймен ғана шектелмейді. Нағыз арман — адамның жан дүниесін жалынына орап, әрекетке жетелейді. Біреу бала күнінен ұстаз болуды армандаса, енді бірі сахна төрінен көрінуді көксейді. Армансыз адам — жапырағы қураған ағаш іспетті. Ол тұрады, бірақ өспейді. Өмір сүреді, бірақ өркендемейді. Ал арман қуған жан – ішкі дауысын тыңдаған, көкжиегін кеңейткен тұлға.
Адамдар арман арқылы үндесіп, ортақ мақсаты үшін жұмыла алады. Армандар — адамдарды жақындастыратын көрінбейтін алтын жіп. Бір ананың арманы — баласының амандығы болса, бір сарбаздың арманы — еліне тыныштық орнауы. Осылай әр адамның арманы – бір халықтың тағдырына айналады. Ортақ арман — елдің тұтастығы мен іргесінің мызғымауына кепіл.
Шығармашылықтың негізінде де арман тұрады. Кез келген өнер туындысының артында — шабытты сәтте туған бір арманың ізі бар. Мұқағали өзінің қиялымен мәңгілікке үн қатты, Шоқан арманы арқылы ғылымға жол ашты. Ұлы істер — алдымен жүректе бүр жарған армандардан бастау алған. Арман — адам ақылы мен жүрегінің одағы. Ол — сана мен сезімнің тоғысқан тұсы.
Алайда, арманға жету жолы – тегіс емес. Бұл жолда шаршау бар, сүріну бар, күмән мен қорқыныш бар. Арманның жетегінде кеткен адам кейде күйрейді, кейде қайта тұрады. Бірақ ол — тірі. Ол — шынайы өмір сүріп жатқан жан. Армандау — сенің адам болып өмір сүріп жатқаныңның белгісі.
Кейде арманың орындалмайды. Бірақ ол — бекерге болмаған. Себебі сол арман сені өсірді, шыңдады, өзіңді тануға үйретті. Арман — нәтиже емес, ол — үдеріс. Арман — аяқталған күй емес, үнемі жалғасып жатқан әуен. Армансыз адам – үнсіз әлем. Сондықтан армандаудан қорықпа. Арманыңды жүрегіңнің төріне отырғыз. Оған сен, оны қорға, ол үшін күрес. Себебі арман — сенің болашақтағы бейнең. Арман — бүгінгі әрекетіңнің ертеңгі жемісі.
Армандаған адам ғана шын өмір сүреді.
