Қазақстанның үздік бес туристік ауылы анықталды
ИИ
Kazakh Tourism “Үздік туристік ауыл – 2025” ұлттық байқауының қорытындысын жариялады. Жоба елдің бірегей табиғи ландшафттарын, дәстүрлер мен қолөнерді сақтаған ауылдық аумақтарды анықтап, оларды ілгерілетуге бағытталған.
Байқау аясында облыс әкімдіктеріне өңірден үш ауылды ұсыну мүмкіндігі берілді. Үміткерлерді іріктеу кезінде олардың табиғи және мәдени ресурстары, дәстүрлі қызмет түрлерінің сақталуы басты назарға алынды. Нәтижесінде, Қазақстанның үздік бес туристік ауылы ретінде келесі елді мекендер таңдалды:
Лепсі (Жетісу облысы, Алакөл ауданы)
Нағи Ілиясов (Қызылорда облысы, Сырдария ауданы)
Хан Ордасы (БҚО, Бөкей ордасы ауданы)
Поперечное (ШҚО, Риддер ауданы)
Шабанбай би (Қарағанды облысы, Ақтоғай ауданы)
Бұл ауылдар енді Қазақстан атынан БҰҰ Дүниежүзілік туристік ұйымы (UNWTO) ұйымдастыратын UN Tourism Best Tourism Village халықаралық байқауына қатысады. Айта кету керек, 2023 жылы Алматы облысындағы Саты ауылы осы байқауда жеңімпаз атанып, беделді UNWTO марапатына ие болған еді.
