Жапония бапкері Астананың тазалығына тәнті болды

Астана қаласының әкімдігі
Астана қаласында өтіп жатқан ITTF World Para Challenger Astana 2025 халықаралық турнирі аясында елордаға алғаш рет келген Жапонияның пара үстел теннисі құрамасының бапкері Чихо Кояма Қазақстан астанасынан алған әсерімен бөлісті.
- Менің атым - Чихо Кояма. Біз Жапониядағы интеллектуалды бұзылыстары бар адамдар қауымдастығы атынан келіп отырмыз. Қазақстанда алғаш ретпіз. Астана бізді ерекше таңғалдырды - таза әрі көркем қала. Тіпті кейбір әріптестерім: «Көшелері Жапониядағыдай тап-таза екен», - деп жатыр. Бұл біз үшін күтпеген әрі жағымды әсер болды. Енді қазақ елінің қонақжайлығын үнемі жылы лебізбен еске алып жүретін боламыз, - деді ол.
Айта кетейік, турнир Халықаралық үстел теннисі федерациясының (ITTF) ресми күнтізбесіне енген және 2028 жылғы Лос-Анджелес Паралимпиадасы мен әлем чемпионатына іріктеу кезеңі болып саналады.
Додада әлемнің 15-тен астам елінен келген 140-қа жуық спортшы бақ сынауда. Олар арасында Қазақстан, Жапония, Малайзия, Үндістан, Франция, Германия, Оңтүстік Корея, Түркия және басқа да елдер бар. Қатысушылар жекелей және жұптық санаттарда өнер көрсетіп жатыр.
Астананың намысын бұл турнирде Сауле Айдарханова, Гүлмира Қайдасова, Алтынай Ержанқызы, Александра Степанова, Балзия Таш, Жанна Әлиева, Ринат Гильфанов, Станислав Сигарев және Антонина Рогова қорғауда. Олар ел қоржынына ұпай жинап, алдағы маңызды халықаралық додаларға жолдама алу үшін күресуде.
Еске сала кетсек, 2024 жылы Қазақстан алғаш рет ITTF Fa20 Astana Para Open турнирін өткізген болатын. Бұл жарыс аймақта пара үстел теннисін дамытудағы маңызды алаңға айналды.