АТА-АНАДАН БАЛАҒА ӨТЕТІН ҚҰНДЫЛЫҚТАР
Ата-аналар балаларының алғашқы ұстаздары , олардың өмірге деген көзқарасын, мінез-құлқын және құндылықтарын қалыптастырады. Отбасында берілетін тәрбие мен құндылықтар баланың болашақтағы тұлғалық дамуына және қоғамдағы орнына тікелей әсер етеді.
Ата-ананың балаға беретін ең маңызды құндылықтарының бірі – адамгершілік. Әл-Фараби: «Адамға ең бірінші білім емес, тәрбие берілуі керек, тәрбиесіз берілген білім – адамзаттың хас жауы» деген. Отбасында шыншылдық, әділдік, мейірімділік сияқты қасиеттерді үйрету арқылы бала дұрыс мінез-құлық қалыптастырады. Жақсы үлгі-өнегені бойына сіңіріп өскен бала жаман әдет-қылыққа бармайды.
Бала отбасында еңбекқорлық пен жауапкершілікті ата-анасының іс-әрекеті арқылы үйренеді. Ата-аналар өз еңбектерімен, міндеттеріне адалдығымен үлгі көрсеткенде, бала да осы қасиеттерді бойына сіңіреді. Бұл оның болашақта өз ісіне жауапкершілікпен қарауына және қоғамда белсенді азамат болуына негіз болады.
Ата-анадан балаға берілетін құндылықтар оның өмір жолында бағыт-бағдар беретін компас іспетті. Отбасында қалыптасқан мәдени, рухани, адамгершілік және еңбекқорлық құндылықтар баланың толыққанды тұлға болып қалыптасуына ықпал етеді. Сондықтан әрбір ата-ана өз баласына дұрыс тәрбие мен құндылықтарды үйретуге ерекше мән беруі қажет.
