Каспийде штурмандар шеберлігін шыңдады
Қазақстан Республикасы Қорғаныс министрлігі
Каспий теңізінің орталық бөлігінде Қазақстан Әскери-теңіз күштерінің әскери қызметшілері оқу-жаттығу штурмандық жорығына шықты. Жорық аясында теңізшілер кеме жүргізу машықтарын жетілдіріп, штурмандық қызметті нақты жағдайда ұйымдастыруды тәжірибе жүзінде меңгерді.
Жаттығудың басты мақсаты - штурмандық дайындық деңгейін көтеру және кәсіби құзыреттілікті арттыру. Оқу барысында жеке құрам штурмандық вахтаға дайындықтан өтіп, вахталық офицерлер құрамындағы әрекеттерін пысықтады. Сонымен қатар теориялық білімдерін нақты жағдайда бекітіп, жорық жағдайында іске асыруды үйренді.
- Мұндай жорықтар теңізшілердің кәсіби шеберлігін арттырып қана қоймай, көшбасшылық қасиеттерін қалыптастырып, штурмандық қызметтің жауынгерлік әлеуетін нығайтуға ықпал етеді, - деді штурмандық дайындық бойынша штабтың жетекші маманы, капитан-лейтенант Қуанышбек Дүйсембаев.
Сабақ барысында теңіздегі әскери іс-қимылдар театрының ерекшеліктері зерттеліп, түрлі кеме жүргізу тәсілдері мен навигациялық міндеттерді шешуге баса назар аударылды. Жорық қорытындысы бойынша штурмандық жауынгерлік бөлімшенің офицерлері сынақтан сәтті өтті.
