«Мерейтой иелері – 2025» көрмесі
Қазақстан Республикасының Мәдениет және ақпарат министрлігі
2025 жылғы 18 шілдеде Әбілхан Қастеев атындағы Қазақстан Республикасының Мемлекеттік өнер музейінде «Мерейтой иелері – 2025» атты көрменің ашылу салтанаты өтті. Бұл — бейнелеу өнерінің әр кезеңінде халқымыздың рухани болмысын көркем тілмен жеткізе білген майталман суретшілерге арналған тағзым көрмесі.
Көрмеде қазақ бейнелеу өнерінің тарихында өшпес із қалдырған қылқалам шеберлерінің туындылары топтастырылған. ХХ ғасырда қазақстандық көркемсурет мектебінің қалыптасуына үлес қосқан бірнеше буын өкілдерінің шығармашылығы осы бір көрмеде тоғысып отыр. Олардың қатарында Николай Хлудов, Валентин Антощенко-Оленев, Валерий Каптерев, Татьяна Глебова сынды айтулы есімдер бар.
Николай Хлудов – қазақ топырағында реалистік кескіндеме мектебін кеңінен танытқан суретшілердің бірі. XIX ғасырдың соңында Қазақстанға келіп, қазақ тұрмысы мен табиғатын кескіндеген көркем туындылар жазды. Оның шығармашылығы – дәуірдің бейнесін сурет тілімен жеткізудің үлгісі.
Молдахмет Кенбаев – Қазақ КСР-інің халық суретшісі, ұлттық кескіндеме өнерінің дамуына сүбелі үлес қосқан тұлға. Ол – шетелде кәсіби көркем білім алған алғашқы қазақ суретшілерінің бірі. Оның еңбектерінен терең философия мен ұлттық рең көрінеді.
Хакімжан Наурызбаев – Қазақстандағы мүсін өнерінің негізін қалаушы. Ол — халқымыздың рухын, еңбегі мен ерлігін мүсінге айналдырып, ұрпаққа мұра қалдырған шебер. Оның портреттер галереясы – нағыз тарихи шежіре.
Валентин Антощенко-Оленев – графика жанрын өрге сүйреген дара тұлға. Ақ-қара линогравюра техникасында жасаған жұмыстары – формасы қарапайым болғанымен, мағынасы терең, көркемдігі жоғары туындылар.
Бұл көрме – қылқалам шеберлеріне деген құрметтің белгісі ғана емес, сондай-ақ олардың көзімен сол заманның рухын сезінуге мүмкіндік беретін бірегей мәдени оқиға. Өнер туындылары бізді өткенмен жалғай отырып, уақыт пен кеңістіктің шекарасынан асып түседі.
Көрме 2025 жылдың 18 тамызына дейін жалғасады. Өнер сүйер қауымға – уақытпен сырласуға керемет мүмкіндік!
