Рахман қайнары – шипа мен серуен мекені
Шығыс Қазақстан облысының әкімдігі
Шығыс Қазақстан облысы медициналық туризм орталығы ретінде қарқынды дамып келеді. Табиғаты көркем, ауасы таза, шипалы жерлерге бай өңірдің інжу-маржандарының бірі - Катонқарағай ауданындағы Рахман қайнары. Мұнда белсенді демалыс пен денсаулықты қалпына келтіру бір-бірімен үйлесім тапқан.
Бұл шипажай емдік термалды бұлақтарымен, саф тау ауасымен және әсем табиғатымен көптен бері танымал. Бүгінде Рахман қайнары - медициналық туризмнің маңызды бағыты. Курортта демалушылар марал мүйізінің сығындысынан алынған пантокринмен ем қабылдайды. Бұл әдіс иммунитетті көтеріп, күш-қуатты арттырады, буын аурулары мен созылмалы шаршауға шипа береді.
Қонақтар медициналық тексеруден өтіп, қалпына келтіру процедураларынан соң марал фермаларына экскурсия жасайды, атпен серуендеп, тауға жаяу шығады. Ем мен демалыстың тиімді үйлесімі Қазақстан мен шетелден туристердің қызығушылығын арттырып отыр.
Сарапшылардың айтуынша, өңір инфрақұрылымы халықаралық стандарттарға сай дамуда. ШҚО-да заманауи клиникалар жұмыс істейді, мұнда тексерістен өтуге, мамандардан кеңес алуға, тіпті күрделі оталар жасауға мүмкіндік бар.
Рахман қайнары секілді шипажайлардың өркендеуі шетелге емделуге шығатындардың санын азайтып, өңірдің қолжетімді әрі сапалы ем-шипа орталығы ретіндегі беделін нығайтады.
