Қарағандылық археологтар мен Алан Аутрам бірлескен зерттеу жүргізеді
Қарағанды облысының әкімдігі
Қарағандылық археологтар мен Ұлыбританияның танымал археозоологы, Эксетер университетінің профессоры Алан Аутрам арасында халықаралық ғылыми ынтымақтастық жалғасуда. Белгілі ғалым қазіргі Қазақстан аумағындағы жылқыны қолға үйрету тарихына қатысты ауқымды зерттеу жүргізуді жоспарлап отыр.
Зерттеу барысында Аутрамға қажетті археологиялық материалдарды Сарыарқа археологиялық институтының мамандары ұсынбақ. Ұлыбританияға Қостанай облысындағы Кент пен Лисаков қорымдарынан табылған жылқы сүйектері жіберіледі. Бұл сүйектер Эксетер университетінің заманауи зертханасында терең зерттелетін болады.
Сарыарқа археологиялық институтының директоры Алексей Кукушкиннің айтуынша, профессор Аутрам бұған дейін де институтпен тығыз байланыста жұмыс істеген, ал қазақстандық археологтар Эксетер университетінде тәжірибе алмасқан.
- Профессордың біздің институтты таңдауы кездейсоқ емес. Біздегі артефактілер мен ғылыми деректер қола дәуірінің тарихын зерттеуде аса құнды, – деді ол.
Алан Аутрам ежелгі жануар сүйектерін, әсіресе адам мен жануар арасындағы тарихи қарым-қатынасты зерттеу саласында жетекші мамандардың бірі саналады. Бұл жолғы мақсаты – қола дәуірінде Қазақстан жерінде өмір сүрген көшпелі қоғамдардың мал шаруашылығын, соның ішінде жылқыны қолға үйрету мәдениетін ғылыми тұрғыда зерделеу.
Зерттеу қорытындысы бойынша халықаралық беделді ғылыми журналдардың бірінде бірлескен мақала жарияланбақ. Онда профессор Аутрам зертханалық сараптама нәтижелерін ұсынса, қазақстандық археологтар жылқы сүйектері табылған археологиялық контексті сипаттайды.
