САНАТ АСУАТ – қазақ өнерінің жарқыраған жаңа жұлдызы
Фото: Instagram / sanat_asuat
Атырау өңірінен шыққан 19 жастағы талантты өнерпаз Санат Асуат "Әзербайжан дауысы" халықаралық байқауында көрермендер мен қазылар алқасының ыстық ықыласына бөленді. Жас әншінің сахнаға шыққан сәтінде төрешілердің үшеуі бірдей орнынан тұрып, өнеріне тәнті болды. Бұл – кәсіби деңгейде қалыптасып келе жатқан жас әншінің үлкен сахнадағы жарқын жетістігі.
Санаттың ән айту мәнері, дауыс ерекшелігі ғана емес, оның сахнадағы эмоциясы мен актерлік шеберлігі де көпшілікті тәнті етті. Қазылар алқасы оны тәжірибелі әртістерге теңеп, болашағынан зор үміт күтетінін жасырмады. Атыраудан келген бойжеткеннің жүректі тербеткен әні әлеуметтік желілерде кеңінен таралып, тыңдармандардың ыстық ықыласына ие болды.
Санаттың бұл өнері тек отандық аудиторияны ғана емес, халықаралық көрермендерді де бей-жай қалдырмады. Оның орындауы әлемдік "The Voice" жобасының үздік нөмірлер топтамасына енді. Бұл тізімді "Best of the Voice" атты ресми YouTube арнасы жариялап отыр. 4,7 миллионнан астам жазылушысы бар бұл арнада жарияланған бейнежазба – жас өнерпаз үшін үлкен халықаралық мойындалу.
Санат Асуат бүгінде Т. Жүргенов атындағы Қазақ ұлттық өнер академиясында білім алады. Дина Нұрпейісова атындағы музыка мектебінің түлегі. Оның шығармашылық жолындағы жетістіктері аз емес: ол Junior Eurovision Kazakhstan ұлттық іріктеуінің финалисі, сондай-ақ Еуропада өткен WAF Awards халықаралық байқауының жеңімпазы.
Санаттың басты жанкүйері – оның анасы. Анасы қызын әрдайым қолдап, шабыттандырып отырады. Ол қызын халықаралық деңгейдегі үздік орындаушылар қатарына қосылғанын үлкен рухани жеңіс деп есептейді. Бұл – тек Санаттың емес, күллі қазақ өнерінің биік белесі.
Әлеуметтік желілерде Санаттың өнеріне деген пікірлер легі толастар емес. Тыңдармандар оның бойында үлкен сахнаға лайық даралық, жүректі баурайтын харизма бар екенін жарыса жазуда. Алайда кейбір қолданушылар өкінішпен бір жайтты еске салады – неге біздің таланттар тек шет ел сахналарында ғана танылып жүр?
Санат Асуаттың бұл жетістігі – қазақ жастарының талантты, еңбекқор әрі халықаралық деңгейде мойындала алатынын көрсететін айқын дәлел. Оның өнер жолындағы бұл қадамы – келешекте талай шыңды бағындырудың бастамасы болары анық.
Қазақ өнерінің жаңа жұлдызына айналып келе жатқан Санатқа шығармашылық табыс, биік белестер тілейміз!
